31 اكتوبر

انا احتفلت بعيد ميلادك شهر اكتوبر كله

عيد ميلادك 30 اكتوبر

زي ما احتفلت 29 يوم قبل يوم عيدك ليه احرم نفسي من يوم زياده بعد عيد ميلادك

خلي احتفالي بيكي طول الشهر...زي ما انتي حتفضلي جوايا طول العمر

الحمد لله ان اكتوبر31 يوم يا ريته كان 365

 قوليلهم

لو ورييتهم هديتي وسألوكي مين ده جاوبي متتردديش

                                 او حتي وريهم كل كلمه كتبتهالك وهما لوحدهم حيفهموا

قوليلهم ده اللي حب علشاني مش علشانه يعيش

                                           وعشان يحبني اكتر رجع سنين العمر من اوله

عمل عيد ميلادي شهر بحاله ومقاليش

                                           ولو عليه يحتفل الشهر ورا الشهر ويوصله

قوليلهم ده اللي حب وعمر ماايدي لمست ايده حتي في سلام

قوليلهم ده اللي حب وعمره ما سمع مني من الحب كلام

قوليلهم ده اللي عشئ ايامي حبني وانا صاحيه وسهرلي لحد مانام

وحتي لما بنام

يعز عليه النوم ومن خوفه يصحيني بيكتبلي ويسهرلي

هو اللي جمع سنين العمر في عقد وزين بيهم صدري

هو اللي كلم عني الشجر والرمل والنجوم دا حتي كلم عني قمري

ده اللي واهب لي عمره واتمني لو اخد منه لجل مايزيد عمري

داحتي من كتر ماحبني شبهني بوطنه وقالي انتي مصري

ماهو حاسسني سكن وامان وجوا عنيا وطنه

مبيحسش بغربه الا في زعلي اكمن علي كفوفي سكنه

قوليلهم عمره ما وعدني بحاجه وخلف وعده

عمر ماحاجه بعدته عني حتي لو انشغلت عنه

قوليلهم استناني وفي غيابي طيفه بيشاغله

تصدقوا انهم بيتكلموا مع بعض يسالوا ويجاوبه؟

لما بوحشه يساله عني وطيفي يطمن قلبه

تصدقوا انه عرف شكل عربيتي ولونها لوحده

بيقول كانه شافني فيها وانا حتي عمري ما عديت جنبه

مش بقولكم انا عمري ماكان ادام عنيا وشوفته

تعرفوا ان ليه نجمه مصاحبها بيحكيلها عني؟

يوصيها عليا ويحلفها لتاخد بالها مني

لما بغيب عنه يبعت النجمه دي عندي

قالي ان من شوئه بيشوف في نورها وشي

بيقولي انها لما بتكون بتضحك عنك بتطمني

خليني ازود  كلام علي كلمتك

 حقولهم اني مبضحكش الا في صوت ضحكتك

وتهون اللحظه من عمري لو مقضتهاش في محبتك

واني اسعد من ف الدنيا اكمن هديتي فرحتك

كل سنه وانتي طيبه

كل لحظه وانتي قريبه

30 اكتوبر

                             خلص الكلام وحيفضل العهد والوعد

كل سنه وانتي حبيبتي

يارب تكون هديتي عجبتك

يارب يسعد كل اوقاتك

يارب يقدرني اسعدك

عارف اني بقصر ناحيتك بس غصب عني

ربنا مش بيدينا كل حاجه

بس انا اخدت كل حاجه لما حبيتك

يمكن شويه الحياه عندي مش سهله بس انتي خلتيها حلوه

سامحيني لو ظروفي منعاني اكون معاكي النهارده

بس غصب عني 

يمكن احساسي انك دايما جوا حضني

بيعوضني شويه

بس حقولك سر

ربنا وحده اعلم اني بكتبلك دلوقتي 

يوم السبت الساعه 6.47 صباحا

اليوم اللي كلمتك من اسماعيليه 

وانتي كنتي مشغوله يعني قبل عيد ميلادك بحوالي 6 ايام

بس اقسم بالله عيني مش شايفه الشاشه من الدموع اللي بتنزل

بس لاني رغم حبي ليكي بحس اني مقصر معاكي 

بس انتي عارفه ان حبيبك جدع صح؟

انا حكسر الصخر عشان اقدر اقرب اكتر

انا مش حقدر اعيش من غيرك

كل سنه وانتي منوره حياتي

كل سنه وانتي منوره دنيتي

كل سنه وانتي دنيتي 

مش عارف حقدر اكلمك اليوم ده

بس انا عايزك تفرحي

اضحكي

املي الدنيا ضحكتك

بس ضحكتك هي اللي ممكن تفرحني بفرحتك

بس اوعي تنسي قلب عايش عشان يحبك

بحبك

بيري انا بحبك

29 اكتوبر  

                                                                                          

انا متعود بقدم هديتك 29 عشان كده النهارده يوم الهديه عشان بكره تكوني براحتك

الخواطر دي اتكتبت عشان يوم عيد ميلادك

يعني فضلت اكتب فيها علي مدار الشهر كل ماحس بفكره اكتبهالك

×××××××××××××××××××××××××××××××××××××××××××××

انا بكتب قبل يوم 30

وعشان كده انا حكتبلك النهارده عن حبي ليكي

انا الايام الفاتت احتفلت بيكي بس دي انا كتبتها بس عشان اقولك

كل سنه وانتي الخير ماليكي

والسعاده مفرحاكي

ولا امنيه تتمنيها الا وتنوليها

يارب ما يعدي الحزن يوم علي قلبها

ولا تفارئ البسمه شفايفها

يارب لو كنت خير لها قربيني ليها

ولو كنت مش خير ابعدني عنها بس متحرمنيش من اخبارها

يارب اكون لها بسمه حلوه

او دنيا واسعه

ولو حان الاجل وخلص العمر خليني ذكري حلوه تفتكرها دايما بالخير

كل سنه بتاعتي حقولهالك في اخر سطر في الخواطر

*****************

لما تلائي نفسك من جديد بتتولد وكأن كل اللي فات ما فات هو ده العجيب

وما كل اللي كانوا حواليك ناسيهم وبكيانك تكون لواحد بس... ده غريب

مع كل مسافه تبعد عن ناس وتقابل غيرهم بس لوحده يفضل هو القريب

لو حصل لك كده افرح...اعرف انك اخيرا قابلت في دنيتك الحبيب

ممكن تقابل نور قوي من قوته يزغلل عنيك...تقع وماتشوف

او نور خافت من خفوته ما تشوف رجليك....تموت من الخوف

حبيبك بنوره ينور حياتك كلها نوره خارج منيك...نوره لعنيك مألوف

هو مين اللي خلي العين من وسط السما تختار نجمه معينه تحب تكلمها

طب ليه صدر الام من بين كل الصدور ترمي راسك عليه وتحنلها

او حتي قلبك يرئ لطفله صغيره بضحكتها البريئه وتحب تبصلها

هي كده..وعشان كده انتي اللي مشاعري عشئتك وفي حبها سهرتلها

14 شهر و16 يوم ويوم ورا يوم يزيد حبك

                                                    افكرك بيهم يوم يوم لو كنت حبيبي ناسي

سكنتي قلبي واتمنيت بس لو حتي ازور قلبك

                                                   وبكل مافيا سلمتلك لو حنين او حتي آسي

من شوئي ليكي حبيت اكون قطك او حتي ضلك

                                               من كتر ماحبك ماليني وساكن قلبي ويا راسي

يسلملي حبك تسلملي عنيكي يسلملي يالحبيبه اسمك

                                          يا فجر عمري يا شمس نهاري يا قمري وكل ناسي

في عيد ميلادك اهنيكي واهنيني واطلب منك تسامحيني

والله بكل ما فيا حبيتك واتمنيتك ولو قصرت اعذريني

يمكن كل اللي فيا مكنش كفايه وانتي بحنيتك مرتضيش تعاتبيني

او غصب عني زعلتك يوم وفكرتي ساعتها تنسيني

سامحيني لو زعلتك وسامحيني حتي لو انتي زعلتيني

يمكن لو كنت فهمتك اكتر كنتي قدرتي من زعلي تخرجيني

سامحيني لو بتكلم كتير بس بتوحشني وبعادك بيكويني

انا بس اللي مريحني ان عمري ماقصرت وكنت قاصد

عمر ما بعدتي عني ف يوم وقلت اعمل زيها واباعد

دايما حاضن حلمك في صدري وف وش الظروف صامد

ولا حاجه قللت حبك بلعكس في عز جفاكي حبك بيتزايد

بيزيد لحد ما تحسيه من جوا القلب فايض

مش حقولك اوعديني بس استحلفك ما تطولي بعادك تاني

الايام اللي فاتت وبعدتي فيها مين حيعوضني لوعتي وانتي وحشاني

استحلفك بكل دقيقه عشئك فيها القلب ماتنامي في يوم ناسياني

متصدئيش ضحكتي بعد غيابك مره دانا بيها بداري صوت دمعه وجعاني

اوعي تشيليني من حلمك مانا عايشلك ..كتير تكوني حلماني؟

يكفيني الحلم لو كان حلو اما العلم فانتي ف كل لحظه مشاركاني

لو مره طال الليل اكيد من بعده جاي نهار           

                                                                      ولا مره كانت العتمه مكمله

لما تحب آمن بحبك ولو مره نمت محتار 

                                             لابد عن يوم يوصل حبك وتنام مشاعرك مطمنه

مفيش نجاح توصله من غير تعب مشوار

                                           عمرك سمعت عن وليد اتولد بضحكه مش بالبكا؟

لو الظروف صعبه اخلق من احباطك اصرار

                                             وازاي من غير الحزن ممكن تعرف معني الهنا

حبك فجر جوايا بدل نهر الحب الاف الانهار

                                               لو حتي من دمي انتي تفرحي واشوفك متبسمه

حيقولولك كل سنه وانتي طيبه يا قمر او حتي اميرة البحار

         انا وحدي حقولك يارب يملاكي الخير والفرح والرضا كل سنه وطول السنه

28 اكتوبر

وحشتيني

مش برضه حروف كلمه وحشتيني 7 حروف

طب دول يوصفوا ايه من شوق قلب ملهوف

داحنيني ليك يحتاج م الحروف الوف والوف

الوف تحكيلك  وانت بعيد ازاي بموت م الخوف

والوف تقولك حبيبي عيني تحلم لسحرك تشوف

والوف تشكيلك لوعه قلب بيدور عليك ويطوف

طب حسي كلمه الو تلاقيها وحشتيني

اسمعي كلمه باي تلاقيها حتوحشيني

اول مااقول سلام  يقتلني شوقي و حنيني

دانا لسه قافل هو انتي لحقتي توحشيني

ازاي بسرعه تخدني ظنون وتوديني

ازاي كده .. حلفتك لو عارفه جاوبيني

ازاي اسرني حبك ورضيت ..عرفيني

يجاوبيني قلبي العاشق عشانها حب عمري وسنيني

27 اكتوبر

               كل عيد حب

                                    

يكفيني مشيت في طريق يمكن في يوم كان قريب منك

يمكن عديت من تحت نجمه كنت بعتهالك مرة تودك

او نقطة مطرلمستني ونقطه من نفس السحابه بلت خدك

دليني علي ارض عديتي عليها اوطي ابوسها

او شجره مريتي يوم تحتها وانا اعدي زيك واحضنها

لو عارف لطريقك طرقات في القلب حرسم عنوانها

ححفظها واذاكرها

حفهمها واتعلمها

لو حتي مرسومه بخط هيروغيليفي حترجمها

ولا اقولك مش محتاج اترجمها

خلي قلبي ياخدني لعنيكي من غير عنوان يوصلها

ماهي عنيكي عنواني كل ما ببعد عنها برجعها

خلي روحي تاخدني ليكي تقابل روحك تكلمها

من غير سلام تسلمها

من غير كلام تحكيلها

من غير دموع لفرحه لقاها تبكيلها

خليها حبيبي تمسك ايديها تطمنها

خليها تحكيلها حكاية تنيمها

خليها تغطيها وتبوس جبينها

تسهر جنبها تسرح شعرها وتلم خصلها

ترجعها لورا خايفه من نومها تئومها

خليها لما تغمض عنيها تسيبها من غير ما تودعها

مفيش وداع ماهي عارفه انها من تاني راجعلها 

مع كل عيد حب تزيد نص سنه من عمرحبي ليكي

مانا عرفتك يوم 14 وكأن الزمان بعد الجفا هداني بيكي

الناس تستني عيد الحب وانا كل 14كل شهر اعيد عليكي

بس بردو ححتفل معاهم وافكر ايه اهديكي

والله هديتك حب صادق يعيش العمر معاكي يكفيكي

 هديتك قلبي م الدنيا يحافظ عليكي ويصونك ويخبيكي

هديتك كل ثانيه في عمري اشتاق اشوف عنيكي

هديتك كل قطره دم في وريدي اصبها في وريدك وبعمري افديكي

كل عيد حب وانتي طيبه وحبي ليكي حبيبي يملي غناويكي

اهديكي ورده حمره بلون الحب وبوسه علي جبينك وايديكي

  

26 اكتوبر          
 اوعديني متبعديش

انا اللي حبك حب وكلمه بحبك لحبه متساويش

لوهي عندك غاليه انتي اغلي والكلمه مترضنيش

مبقتش توصف شوقي اصل انتي دنيا جواها بعيش

مانا اللي شوقه لقربك شعله نار آيده مبتنطفيش

انا اللي بايده اسيرك راضي بامرك ولو مأمرتيش

حتي بعادك مش حاسه مانا حته منك موحشتكيش؟

حته منك بس وحشاني وواحشك حتي لو مردتيش

عارفه ان الدنيا بهمومها وانا جنبك متهمنيش؟

حاسه ان الثانيه في قربك تساوي سنين متنتهيش

عارف بيري يومي معاك؟ ححكيلك بس متزهقيش

بصحي احسك خلاص واحشني وانت عن حلمي مفارقتنيش

مع كل ندهة ادان ادعي ربي افضل في قلبك ومتنسنيش

الليله تيجي اترجي ساعتها تجيبك ليا وتطول ولا تعديش

وساعة النوم باخدك في حضني حتي لو قلتي متضمنيش

ساعاتي في بعدك طويله ولو كلمتك تمر ثواني ولا تهديش

مشاكل ودماغ مشغوله انساها بيكي كنت فاكرها متتنسيش

ليه ليكي سحر بيغسل روحي

ليه كده قادره تداوي جروحي

ليه مش عايزه ف مره تبوحي

دانا بحلم بيكي تقولي "بحبك" تكرريها متوقفيش

عارف يا سنين ماضي وعمري الجاي بدونك مقدرش اعيش

مش حاسه اني فارقت العالم بس انت يا عشقي متفارقنيش

وعدتك بالحب واديني هويتك اوعديني ..متبعديش؟

25 اكتوبر

 انا قلت لك اني حقدم هديتي بدري عشان تعرفي تقريها براحتك قبل عيد ميلادك

وعشان في ايام حتكون هديتي بين ايديك ومش حعرف اكتب فيها انا اخترت اكتبلك فيها خواطر من اللي كتيتهالك وحختار منهم حاجات يا رب تعجبك بس طبعا يوم 30 خواطر جديده لانها هديتي بتاعة يوم 30 لكن المدونه دي احتفالي بشهر ميلادك كله

انا حبدأ بالخواطر اللي لما خلصتها قلتي لي خساره انها خلصت

لو بتحب بجد

معناها ايه انك تنامي في حضني

ولو صحيتي ولقيتي حضني من تاني تنامي

معناها ايه ازورك في حلو حلمك وتشاركيني انتي في كل احلامي

معناها ايه اعشئ كلامك وتحبي حبيبتي من بين كل الكلام كلامي

معناها ايه تحن الايد لشبكة صوابع من شوئها تحضنها حتي ف سلامي

معناها ايه قربي يسعد وقتك وقربك يحلي مر ايامي

هوانتي حبيبتي حضن حبيبك كان واحشك؟

هو بعدك عنه كان يا قلبي مواحشك؟

كان مضايئك؟

مانتا عارف ان حبيبك لما قالك بحبك مكنش بينافئك

مانتي عارفه ان حبك رهان عمره وبحبه بيسابئك

لو كسبتي حيكافئك

ولو خسرتي حيحبك وبحب كبير حيعاقبك

يعني في كل الاحوال حبيبتي ححبك

وايه يملي قلب مفهوش غيرك غير حبك

هو كمان بيقولك حتوحشيني عشان يفضل مشاغلك

يفضل طيفه ادام عنيكي يلاعبها ويشاغلك

تفاضل روحه تحاضن روحك ولو بعيد البدن حالفه ماتفارئك

حابه تكون ضلك

تحميكي ولو حميت الشمس تطير فوئك تضلك

توهبلك نسمه هوا تلامس خدودك او نبع ميه يرطب شفايفك

تطمن عليكي وتريح قلب ملهوف عليكي وكاني من عندي شايفك

هو انت ليه مجاوبتيش علي سؤالي مانا طول الوقت قلبي مجاوبك

حكرر سؤالي

هو انتي حبيبتي حضن حبيبك كان واحشك؟

عارف انك مش حتجاوبي بس مايهمش

ماهو اول درس في حبك لو بتحب حب من غير ما تفتش

لو بتحب ادي من قلبك من غير ما تستني تكوش

لو بتحب خلي قلبك غطا من حنان ولو بردت الارض

خليه سجاده لحبيبك وافرش

لو بتحب قرب وقول بحبك وسامح من غير ما تخلي بعادك عقاب

توجع بيه وتهوش

لو بتحب ادي الفرصه لحبيبك يفكر يفكر واديله وقته من

غير ما علي تفكيره تشوش

لو بتحب بجد مسيرك يوم تتحب

لو بتحب بجد متحبش جسم ..حب القلب

لو بتحب بجد اوعي تتوب عن حبيبك حتي ولو حسيته ذنب

لو بتحب بجد املي وقت حبيبك حنان وامان املاه حب ..

بس الحب

24 اكتوبر

حكتب واقولك بحبك رغم اني ياما يا حبيبه قلت

بكتبلك عشان وحشني قلمي وورقتي ووحشني ليالي السهد

وحشتني نجمه حبك لما بصيتلها لقتها بتبصلي وتضحكلي

قالت لي عارفه شهر 10 كل سنه وانتوا طيبين ووشوشت لي

قالتلي خلي بالك من حبك دا الحب الحقيقي مش حاجه سهله

اوعي تسيب الحبيب وتشتري حد او حاجه مش مستاهله

الحب الحقيقي اوقاتك وياه حتي في الزعل تخلي العمر احلي

فاهم يعني ايه لو وعلان بردو الوقت في قرب حبيبك يحلي

عارفاك فاهم مانت ياما حكيت لي عن حبيبتنا

ياما كلمتني عنها وسيرتها نورت سهرتنا

مانا فاكره لما كنت بتسالني عنها واطمنك عليها

وفاكره لما كنا بنستناها تكلمك وتسرح لما تفتكر احساسك بحنية ايديها

مانا عارفاك وانت عاشئ حتي لتراب خطاويها

عمري ماشوفتك بتضحك من قلبك الا لو ضحكتك في عنيها

عارفه انك اخترت كل حاجه حلوه وباسمها بتسميها

حبكوا امانه في رقبتك لو زعلت راضيها

اغسل كفوفها بدموعك وبضلوعك دفيها

اغزل من شوئك غطا من الشمس يضلل عليها

شيلها جوا قلبك مش انت راجل ؟ احميها

كل سنه حبها من جديد ومن حبك كفيها

رديت وقلت بتوصيني ؟ مانتي عارفاني

مانتي شاهده علي حبها واد ايه مدوباني

عمركيش حستيني ناسيها حتي لو ناسياني

انا مقدرش انسي حبها اد ايه هناني

شدني من توهتي قبلها ومن الغربه نجاني

انا بحبها حب المولي وحده يعلمه

حبها ليا علم بحاول افهمه واتعلمه

طريقها بمشيه من غير علامات معلمه

عنيها بيت سكنته من غير قلم دقات القلب بترسمه

23 اكتوبر

لو حبيبك حيرك في يوم وحيرتك وصلت لاخر مدي

وسالت نفسك مليون سؤال وليه كده

وقلت مش هو ده اللي في صوت سكاته بسمع صوت الرضا

مش لما بنده انفاسه بترد لقلبي الندا

ده معاه العمر الجديد من الاول ابتدي

من غير ما تسال كتير حبه واوهب له زيي من عمرك فدي

انا وهبت لحبيبي الفرحه حتي ولو كانت في قلبي متردده

خليته كل حياتي حتي ولو قيمتي ف حياته متحدده

لو فكر يأسي مش حيلاقي غير الصبر

لو فكر يبعد حستناه طول العمر

لو خرجني من حضنه راح ابني له جوا حضني قصر

هو اللي عمره بقدمه لجل عيونه مهر

يا قلب كون له من غير ما تستني يكون

مش هو ده الحبيب اللي لجله الدنيا تهون

لو حسيته مشغول كون له الفكره بس ماتضايئه

كون له شعور بالحب لو قلبه احتاجك ومتستناش منه

لما تحب حتفرح انك بس بتحب اللي بيحب حبه بيسعد قلبه

اللي يحب يتنمي وقت القرب مش مهم مين اللي قرب المهم تقربله

قرب وخلي فرحتك احساسك ان قربك حبيبك بيرتاحله

 كون لحبيبك اغنيه حب حابب يسمعها والمس بيها قلبه اوصله

كون له حلم جميل وانس نومه خليك حواليه واسهرله

كون له ضحكه في وسط الحزن ول انت حزين بردو اضحكله

خلي لقاك قطره ندي يستناها كل يوم

متحرموش م الفرحه ولو انت منها محروم

خليك ورده ملمسها كل صباح علي خده يصحيه م النوم

احضن بحضنك همه وشيل من قلب لياليه الهموم

22 اكتوبر

انا النهارده جيت اسماعيليه عشان اكون معاكي

انتي مردتيش وقفلتي فونك

انا فهمت انك اكيد مشغوله بس غصب عني حسيت بوحده في غيابك

مينفعش اكتب حاجه تحسي فيها بزعل

خلي الفرحه دايما في قلبك

عشان كده انا حكتبلك فيها الخواطر اللي كنت كتبتهالك ع الواتس ومردتيش عليها

وقتها كنتي مشدوده اكيد دلوقتي حتحسيها اكتر

قبل مااقابلك كنت مستني الحبيب اللي يقدر يريحني

مكنتش عارف ان الحبيب هو اللي وجوده وبس يفرحني

ولو ع الجرح حبيبي بعده عني وبس في قلبي يجرحني

حبيبي اللي صورته ما تفارئ عيونه بس برضه بيوحشني

لازم تعرف ان صوتك او سكوتك بيطمني

زكري اوقاتنا جوا بعادك بتونسني

بتشاركني وقت غيابك وتقاسمني

عارف يعني ايه تقعد مع حد مش وياك

لا هو وياك بس عنيه مش شيفاك

انت شايفه وحاسه لامس ايديك حتي لو مش لمساك

تتكلم مع ناس كتير بس هو حاسه قاعد جنبك

عقلك بيرد عليهم بس قلبك منيمه في حضنك

اوقات تغير قعدتك لجل ما تعدل راسه علي صدرك

لما تتكلم تخلي بالك لاسمه هو اللي يجي علي شفايفك

اصل مش جنبك ولا لامسك هو م الاصل ساكنك

ويمكن اكتر من كده حبيبك هو انت...انت نفسك

آل كنت مستني حد عشان وياه ارتاح

ماهوياما قابلت وارتحت وف الاخر اتمليت جراح

بس هو فعلا هي دي كانت الراحه ولا جراحهم دي جراح

طب الراحه اللي بحسها في صوتك بأيه اسمها

وتعويرة القلب الواعره في بعادك و بقربك بس تطيبيها

انا قبلك لا اتجرحت ولا ارتحت مشاعري انتي اللي ولدتيها

كانت سطور علي رمل بحر وبموجه من بحرك مسحتيها

انا حتي قبل حبك سنين العمر مكنتش بخاف عليها

من امتي كنت مصدئ ان الحبيب هو اللي بس تحبه

من امتي مكنتش مستنيه يودك اكتر ما بتوده

كنت لما بتقرب خطوه تستناه يجيلك مش انت اللي بتروح له

كنت حافظ كبرياء وكرامه كان في يقرب زي ما بقربله

معاك عرفت ان مش بس  تقرب ..لا حبيبك عيشله

21 اكتوبر

لسه الشفايف بتحن لحروف اسمك تندهلك يوماتي

لساكي حب العمر واغلي الحبايب لساكي حلم بحلمه ليلاتي

لسه القرب منك اغلي الاماني لساكي حضن لساكي امل حياتي

لسه الشوء بيغزلك من خيوط حنينه صوره تونس اوقاتي

لسه الحب بيرج القلب مبيهديش

يزيد معاه الشوء لعنيكي مبينتهيش

لسه الطريق لعنيكي واخدني ومجبنيش

لساكي حضن ضاممني ولو بعدتي حضنك ميبعدنيش

لساني بسمع صوت سكاتك

لو زعلتي تخرج من قلبي انا اهاتك

لساني بسمع كل اغاني الحب في همساتك

لساني واهبلك حب في كل لحظه من حياتك

هو الحضن يغلي ازاي لو انت حبيبي مش جواه

دقات قلبي في ايه تفيد لو راسك مش علي صدري وسمعاه

في ايه يفيد شوء العنين لو مش ليكي وشيفاه

كلام الحب ازاي يحب وازاي يتحب لو مش ليكي وحساه

نبض القلب يتسطر كلمات تندهك حبيبي لجل تسمع نداه

حتي العشئ ايه معناه لو مكنتش حبيبي انت مبتداه ومنتهاه